Фарғона ҳокимидан норози бўлиб очлик эълон қилган Аҳад дорбозни милиция ушлади

29 январь, душанба куни Фарғона вилоят ҳокимлиги биноси олдида очлик эълон қилган Ўзбекистон инсон ҳуқуқлари мустақил ташкилоти фаоли Аҳад Набиев (Аҳад дорбоз) Фарғона шаҳар милициясига олиб кетилди. Аҳад дорбознинг Озодликка айтишича, фарғоналикларни “ҳароми” деб сўккан вилоят ҳокими Шуҳрат Ғаниевга мурожаатлари йиллардан буён жавобсиз қолмоқда.

29 январь Аҳад дорбоз очлик эълон қилганидан бироз ўтиб, Фарғона шаҳар милициясига олиб кетилгани ҳақида “Озодлик”ка Ўзбекистон инсон ҳуқуқлари мустақил ташкилоти раиси Исмоил Одилов хабар қилди.

”Фарғона вилоятида инсон ҳуқуқларининг топталиши, хусусан, фуқаролар мурожаатлари оқибатсиз қолдирилишига қарши вилоят ташкилотимизнинг етакчиси Аҳад Набиев маҳаллий вақт билан эрталаб соат 10 да очлик акциясини бошлаганди. Орадан кўп ўтмай фаолимиз Фарғона шаҳар ИИБ Жиноят қидирув бўлими ходимлари томонидан маҳкамага олиб кетилган”,деди Исмоил Одилов.

Куннинг иккинчи ярмида Аҳад Набиев Фарғона шаҳар ИИБ тезкор вакиллари томонидан тушунтириш хати олинганидан сўнг қўйиб юборилгани, унинг акцияси қонунга зид экани таъкидланиб, унга пўписа қилингани маълум бўлди.

Аҳад дорбознинг Озодликка айтишича, ​шаҳар милицияси бош бошқармасига Фарғона шаҳар ҳокими Шуҳратжон Эркабоев чақиртирилган.

– Шаҳар ҳокими шахсан келди, барча муаммоларни ҳал қиламиз. Ҳокимиятга келинг, муаммоларни батафсил эшитишим керак, деб айтиб кетди. Мен энди шаҳар ҳокимлигидаман, – деди Аҳад дорбоз.

Очлик акциясини эълон қилишдан мақсад эса, Аҳад дорбозга кўра, Фарғона вилояти ҳокимлигининг унинг ва унинг ташкилотига мурожаат қилган фуқароларнинг муаммоларни йиллардан буён ҳал қилмай келаётганидир:

– Менинг очлик акциям аслида вилоят ҳокимлигидан норозилик эди. Вилоят ҳокимлиги, вилоят прокуратурасидан мурожаатимизга жавоб бўлмади-да. Асосий мақсад вилоят ҳокими билан учрашиш эди. 2002 йилдан бери вилоят ҳокимлигаг қатнаймиз, ҳали бирор марта у киши билан учрашиб, гаплашишнинг иложиси бўлмади,- дейди Аҳад Набиев.

Ҳуқуқ фаолининг таъкидича, сўнгги кунларда ижтимоий тармоқлар қаҳрамонига айланган Фарғона вилоят ҳокими Шуҳрат Ғаниевнинг инсон ҳуқуқлари ташкилотлари, фуқаролик жамияти вакиллари билан мутлақо иши йўқ.

Ҳатто вилоятда инсон ҳуқуқлари ташкилотлари мавжудлигини, уларнинг оддий ижара жойлари борасидаги муаммоларини ҳам билмайди.

Шуҳрат Ғаниевнинг 16 юртдоши Ақтўбеда ўлган тошлоқликларни “ҳароми”, деб сўкканига оид хабарларга қисқагина муносабат билдирган ҳуқуқ фаоли: “Кўп эшитяпмиз, матбуотларда ҳам, Интернетларда ҳам чиқиб кетди. Энди вилоят ҳокимининг ўзи биладида қандай йўл тутишни”, деди.

29 январь куни Озодлик билан суҳбатлашаётган кезда Аҳад Набиев Фарғона шаҳар ҳокимлигида эди ва суҳбат у киши ҳокимнинг қабулига кираётган кезда узилди.

Озодлик ҳуқуқ фаолининг теграсидаги вазиятни кузатишда давом этади, янгиликларни сайтимизда кузатиб боринг!

Мақола манбааси: ozodlik.org сайти

Бўлишинг:

Муҳаррир танлови

Собиқ «абу сахий» бозори​даги тадбиркорларга кўчма савдо расталарини олиб ташлаш буюрилмоқда

16 январь куни собиқ «Абу Сахий» бозори, ҳозирги «Тошкент ипак йўли» савдо-комплекс мажмуаси ҳудудида фаолият олиб борувчи сотувчиларга савдо ўринлари ташқарисига ўрнатилган ...

Ўзбекистонда бир киши йил бўйи ўртача 43 кило гўшт ва гўшт маҳсулотлари истеъмол қилади

Бугун, 30 сентябрь куни, Ахборот ва оммавий коммуникациялар агентлигида Давлат статисика қўмитаси марказий аппарати, Тошкент шаҳри ва вилояти статистика бошқармалари ...

Тенгсизлик қаердан келиб чиқмоқда?!

Анчадан буён бир нарса ҳақида ўйлаб юрардим. Биз кўриб турган телевидиниянинг иш юритиш, ахборот узатиш, олиш, кўрсатувлар савиясида мана катта икки йилдирки, Президент бир ...