Бошқа мавзулар
Ўзбекистон собиқ Ички ишлар вазири¸ генерал Зокир Алматов оиласига яқин мулозимнинг Озодликка билдиришича¸ 68 яшар Алматов яна вазирликка қайтган.
Мақола “Озодлик” сайтидан олинди
“Ички ишлар вазири Бобожоновга маслаҳатчи этиб тайинланди. У кишига алоҳида кабинет ва хизмат машинаси ажратилди¸” деди исми очиқланмаслигини сўраган Алматовлар оиласига яқин шахс.
1991-2005 йилларда Ўзбекистон Ички ишлар вазири лавозимида ишлаган Зокиржон Алматов¸ Андижон воқеаларига қадар 1-президент Ислом Каримовга энг яқин вазирлардан бўлган.
Андижон воқеаларидан саноқли ой ўтиб – 2005 йилнинг декабрь ойида Алматов истеъфога чиқарилди ва у раҳбарлик қилган ички ишлар тизимида таркибий ўзгаришлар бошланди. 2005 йилга келиб Алматов раҳбарлигида Ўзбекистондаги энг қудратли вазирликка айланган ИВВнинг кўплаб функциялари Рустам Иноятов раҳбари бўлган Миллий хавфсизлик хизматига олиб берилди.
Кузатувчиларга кўра¸ Алматов истеъфосидан кейин Ички ишлар вазири ва бошқа раҳбарлик лавозимларига асосан МХХ кадрлари тайинланган.
2018 йилнинг 31 январь куни Рустам Иноятов МХХ раислигидан бўшатилиши билан¸ бундай таркибий ўзгаришлар энди МХХда бошланди ва 2005-2007 йилларда бу тизимга ўтказилган бошқармалар яна Ички ишлар вазирлиги тасарруфига қайтарилди.
Озодлик гаплашган ИИВдаги айрим мулозимлар¸ МХХ даги коррупцияга қарши кураш бошқармаси тугатилиб¸ унинг аксар функциялари Ички ишлар вазирлиги қошидаги Жиноят-қидирув бошқармасига берилганини билдирди.
Тошкент ҳукуматига яқин мулозимнинг Озодликка айтишича¸ Зокиржон Алматов айнан кучишлатар тизимларидаги коррупцияга қарши курашни мувофиқлаштиришга масъул этиб тайинланган.
2005 йилнинг 13 май куни Андижонда рўй берган қонли воқеалар ортидан Европа Иттифоқи Ўзбекистон ҳукуматига нисбатан жазо чоралари қўллаган эди. Бу санкцияларнинг бир қисми ўлароқ Андижондаги қонли воқеаларга бевосита масъул деб кўрилган бир гуруҳ Тошкент расмийларининг Европа Иттифоқи ҳудудига кириши тақиқланган ва Зокиржон Алматов номи ана шу рўйхатнинг тепасига қўйилган эди.
Шунга қарамай¸ 2005 йил охирида Зокиржон Алматовнинг Германияда даволанишига инсонийлик нуқтаи-назаридан рухсат этилган ва бу истисно халқаро инсон ҳақлари гуруҳлари танқидига учраган эди.
Вазирликдан кетганидан сўнг Зокиржон Алматовнинг Тошкентда маълум муддат норасмий уй қамоғида сақлангани айтилади.
Шавкат Мирзиëев ҳокимиятга келганидан сўнг Зокиржон Алматовнинг янги президент даврасида кўрилгани ва унга куч ишлатар тизимлари фаолияти бўйича маслаҳатчилик қилаëтгани ҳақида хабарлар тарқаган эди.
Алматовнинг президентга маслаҳатчи этиб тайинлангани ҳақидаги хабарлар расмий тасдиғини топмади.
Айни пайтда¸ унинг Ички ишлар вазирига маслаҳатчи этиб тайинлангани ҳақида ҳам ҳозирча расмий хабар йўқ.
Ички ишлар вазирлигининг ўзини таништирмаган расмийси¸ Зокиржон Алматовнинг вазирликка қайтгани ҳақида гап-сўзлар борлиги¸ аммо унинг қайси мақомда қайтганига оид буйруқни кўрмагани боис¸ аниқ маълумот бера олмаслигини билдирди.
“Ҳозир раҳбарият селектор йиғилишида¸ балки шундан сўнг аниқ маълумот берилар”¸ деди вазирликнинг Озодлик боғланган расмийси 27 февраль куни.
Ҳозирга қадар Ички ишлар вазирлигида вазир маслаҳатчиси лавозими бўлмаган ва сўнгги хабарларга кўра¸ бу лавозим вазир Пўлат Бобожонов буйруғи асосида таъсис этилган.
