Қўшма Штатлар Америка сайлов жараёнига аралашгани учун Россия жавоб бериши кераклиги масаласида бирорта ҳам қадам ташламади, дея баёнот берди сешанба куни Миллий Хавфсизлик Агентлиги (МХА) раҳбари адмирал Майкл Рожерс.
Рожерс Сенатнинг Қуролли кучлар ишлари бўйича қўмитасидаги эшитувларда чиқиш қилди. МХА раҳбари, шунингдек, АҚШ киберқўшинлари штабига ҳам бошчилик қилади. Адмиралнинг баёнот беришича, у Россия киберҳужумларига қарши туриш учун қўлида мавжуд бўлган барча ресурслардан фойдаланади, бироқ Оқ уй бу жиҳозларни такомиллаштиришни ундан сўрамаган ва унга Россия электрон тармоқларига жавоб зарбаси бериш мақсадида қўшимча ваколатлар бермаган.
МХА раҳбарининг чиқишини изоҳлаган Оқ уй матбуот котиби Сара Сандерс “ҳеч ким Рожерсга қўшимча ваколат беришдан бўйин товламаяпти”, дея баёнот берди. Унинг айтишича, Россиянинг киберҳужумлари президент Обама вақтида бошланган ва у бу ҳужумлар тўхтатилиши учун ҳеч нарса қилмаган.
Куни кеча NBC News телекомпанияси Америка разведкасининг юқори лавозимли учта вакилига таянган ҳолда, АҚШ махсус хизматлари Россия хакерлари 2016 йилги президентлик сайлови жараёнида еттита штатда сайлов тизимини бузгани ҳақида кўрсатма топганлигини маълум қилганликлари борасида хабар тарқатган эди.