Уйим яқинидаги фермернинг катта йўл ёқасига тезакдан “тоғ” уюб қўйгани эътиборимни тортди.
– Элда молхона қолдирмай тозалабсан, шекилли? – дедим унга. – Бу йил ўтган йилгидан ҳам кўп йиғибсан, чамамда?
– Йўқ, – деди у бамайлихотир. – Ўтган йил ҳам шунча йиғувдим – бу йил ҳам, фақат…
– Шунча гўнгни катта йўл бўйига ташлатгандан кўра, – ёш фермернинг гапи оғзида қолиб кетди. – Ҳар қулоқни олдига ташлатмайсанми, сув келгандан шарбат қилиб бераверардинг! Энди яна мошина тутасан, яна ортиқча чиқим?
– Оға буёққа қаранг, – гўнг уюми орқасига ўтди у ва:
– Нимани кўряпсиз? – деб сўради.
– Гўнг?
– Бу оддий гўнгмас, бу ўтган йили сиз кўрган гўнг, бу йил йиққан гўнгни унинг устига ташладим!
– Сабаб?
– Катта йўл ёқасидаги ҳамма фермернинг ахволи шу! Тошкентдан ё Нукусдан келадиган текширувчиларни далага гўнг солинаяптими, йўқми – қизиқтирмайди! Уларга йўл ёқасида уюлиб турган гўнг – маҳаллий ўғит қизиқ!
– Маҳаллий ўғитни далангга солсанг, даланинг маҳсулдорлиги ортмайдими?
– Унисини билмадим. Фермер бўлганимга энди икки йил бўлди, лекин қўшни фермернинг катта йўл ёқасига гўнг йиғиб бошлаганига йигирма йилдан ошганмиш – ўзи айтди!
Муаллиф: Қадамбой Отабоев