Ўзбекистонда бизнес-омбудсман тергов ҳибсхоналарига монеликсиз киришга ҳамда тергов қилинаётганлар ва маҳкумларнинг мурожаатларини олишга ҳақли бўлди.
Озодликдан маҳрум қилиш туридаги жазони ижро этиш муассасаларининг ички тартиб қоидаларига ва Ўзбекистон Республикаси Ички ишлар вазирлиги тергов ҳибсхоналарининг ички тартиб қоидаларига тегишли ўзгартириш ва қўшимчалар киритилди.
Бунда тергов ҳибсхоналари маъмурияти томонидан Вакилнинг хавфсизлиги таъминланади. Бу борада бизнес-омбудсман Олий Мажлиснинг Инсон ҳуқуқлари бўйича вакилига тенглаштирилди. Бироқ парламент Вакилидан фарқли ўлароқ, унга жазони ижро этиш колонияларига бундай тартибда киришга рухсат берилмади, деб хабар қилмоқда маҳаллий нашрлар.
ИИВ тергов ҳибсхоналарида ва жазони ижро этиш колонияларида бўлган шахсларнинг Бизнес-омбудсман номига йўллаган ариза ва шикоятлари кўздан кечирилмайди ва муҳрланган тарзда 24 соатдан кечиктирмай юборилади. Телеграммалар эса дарҳол юборилади.