Бошқа мавзулар
Ўзбекистондаги ер ости фойдали қазилмаларининг нархи $5,7 триллионни ташкил этади. Бу ҳақда республика Давлат геология қўмитаси раиси Аъзам Қодирхўжаев шундай деган , деб хабар беради Podrobno.uz.
Разведка қилинган захираларнинг нархи бир триллионга баҳоланган. Раҳбарнинг сўзларига кўра, бироқ мамлакатнинг катта ҳудуди ўрганилмаган, шу боис бундай ерларда кўплаб фойдали қазилмаларнинг топилиши эҳтимолдан ҳоли эмас.
«Фойдали қазилма бойликлари, жумладан, олтин, уран, мис, калий тузи, фосфорит ва каолин бўйича Ўзбекистон жаҳоннинг ўнта етакчи мамлакатларининг бири ҳисобланади. Табиийки, ер ости бойликларини қазийдиган корхоналарга лицензиялар бериш ҳам ортиб бормоқда. Бундай корхоналар Ўзбекистон ишлаб чиқариш саноатига ўзларининг каттта ҳиссаларини қўшмоқдалар. Кейинги йилларда республика Давлат геология қўмитаси томонидан 1200 дан ортиқ шундай лицензиялар берилди», – дейди раҳбар.
Кейинги пайтларда Туркия, Россия ва бошқа давлатлар билан ҳамкорликда қазилма бойликларини разведка қилиш лойиҳалари тасдиқланди. Улар, жумладан, Навоий вилоятида олтин, мис, ноёб металларини қидириш ишлари билан шуғулланадилар. Шунингдек, корейс инвесторлари билан олтин ва вольфрам конларини ўзлаштириш ишлари олиб борилмоқда.
Ўзбекистон олтин ва уран моддасини қазиб чиқариш бўйича дунёнинг энг йирик ўнта мамлакатлари қаторидан ўрин эгаллаган. 2010 йиллар маълумотига кўра, аниқланган олтин захиралари 2,5 минг тоннани ташкил этади. Республикада 1,1 триллион кубометр табиий газ, 1,9 миллард тонна кўмир борлиги аниқланган. 2020 йилга бориб Ўзбекистон кўмир қазиб чиқариш бўйича етакчи мамлакатлари қаторидан ўрин олишни режалаштирган.
Ўзбекистоннинг Олмалиқ мис ишлаб чиқариш заводи Марказий Осиёдаги энг йирик рангли металлар ишлаб чиқарувчи корхона ҳисобланади. Республикада ишлаб чиқарилаётган кумушнинг 90 фоизи, олтиннинг 20 фоизи мана шу корхона зиммасига тўғри келади.
Ўзбекистоннинг 2017 йилги экспорт тузилмасида энергия манбаалари 15 фоизни, қора ва рангли металлар 7 фоизни, кимё маҳсулотлари 6 фоизни эгаллаган. Кейинги йилларда металл ва энергия манбааларини экспорт қилиш ҳажми сезиларли даражада ошган.
Манба: “Фарғона” халқаро ахборот агентлиги
