Россияда 2017 йилнинг октябрида икки ўзбек фуқаросининг ўлдирилиши билан боғлиқ иш очилди.
Россия Тергов қўмитасининг Байкалорти ўлкаси бўйича тергов бошқармаси терговчилари ИИВ минтақавий бошқармаси жиноят қидирувчи бошқармаси ходимлари билан биргаликда, 2017 йилнинг октябрида содир этилган Ўзбекистоннинг икки фуқароси ўлдириши билан боғлиқ ишни тергов қилмоқда.
Маҳкама маълумотларига кўра, РФ Жиноят кодексининг 105-моддаси 2-қисми «а» бандида назарда тутилган жиноятни содир этганлик бўйича айблов Нерчинск тумани қишлоқларидан бирида яшовчи 34 ёшли фуқарога қўйилди.
Ушбу ўта жиддий жиноятни фош қилиш бўйича ишлар жорий йилнинг май ойида бошланди. Ўшанда Ўзбекистон фуқароси ҳуқуқ ҳимоячиларига мурожаат қилиб, Чита шаҳрида икки ватандошининг йўқолганлиги ҳақида хабар берди.
Икки кишининг тўсатдан йўқ бўлиб қолгани ҳақидаги хабар асосида дарҳол жиноят иши қўзғатилди, уни тергов қилишга Россия Тергов қўмитасининг тергов бошқармаси аппарати терговчилари жалб этилди.
Уларнинг аниқлашича, ўтган йилнинг октябрь ойида эркаклар учрашувга йўл олиб, қайтиб келишмаган. Терговчилар полициячилар ҳамкорликдаги иши давомида 1984 йилда туғилган, Нерчинск туманида истиқомат қилувчи шахс эркакларнинг ўлдирилишига алоқадор бўлиши мумкинлигини аниқладилар.
Дастлабки сўроқ пайтидаёқ бу шахс ўзаро низо чоғида қурбонларни ов милтиғидан отиб ўлдиргани, жасадларни эса жиноят изларини яшириш учун кўмиб қўйганини тан олди. Кўрсатувларни текшириш вақтида терговчилар ўлдирилганларнинг жасадини айбланувчи кўрсатган жойдан топдилар.
Суд мурожаати билан айбланувчига нисбатан қамоққа олиш тарзидаги эҳтиёт чораси танланди. Керакли суд экспертизалари, шу жумладан суд-тиббий, ДНК экспертизалари ва бошқалар белгиланди.
Айни пайтда жиноятнинг барча тафсилотларини аниқлашга қаратилган тергов ҳаракатлари амалга оширилмоқда. Жиноий иш бўйича тергов давом этмоқда.