Бошқа мавзуларТуркия сўнгги ойларда АҚШ билан муносабатлари ёмонлашгани ортидан Россия ва Европа Иттифоқи билан савдо-иқтисодий алоқаларни кенгайтириш ҳаракатларини фаоллаштирди.
Туркия президенти Режаб Тоййип Эрдўғон 27 августда Британия ва Германия ҳукуматларини иқтисодий ҳамкорликни кучайтириш бўйича музокараларни бошлашга чақирди.
Ўтган ҳафтада Туркия ташқи ишлар вазири Мавлуд Чавушўғли раҳбарлигидаги делегация Москвага борди. Бу ерда Туркия томонидан Россиянинг С-400 ракеталар тизимини сотиб олиш масаласи муҳокама қилинган.
2016 йилдан бери шу кунгача Эрдўғон ва Путин камида 11 марта учрашиб, музокаралар ўтказди.
АҚШ Европа Иттифоқи ва Туркияга савдо ва иқтисодиёт соҳасида катта бож тўловларини жорий этган эди. Европа Иттифоқи ва Туркия бундан норозилик билдирган.
10 август куни АҚШ президенти Дональд Трамп Туркияга нисбатан иқтисодий санкция жорий қилди ва турк пўлати ва алюминийи импорти тарифларини икки маротаба оширди.
Бунинг ортидан турк лираси кескин қадрсизланиб¸ долларга нисбатан рекорд даражада арзонлади.
