Бошқа мавзуларЖанубий Суданда самолёт ҳалокатга учради. Associated Press агентлиги маҳаллий ҳукумат вакилларига асосланган ҳолда хабар беришича, Жуба шаҳридан учган йўловчи самолёт кўлга қулаб тушиши оқибатида камида 21 киши ҳалок бўлган.
Йироль шаҳри ахборот министри Табан Абеля Агеканинг сўзларига кўра, авиаҳалокатдан фақат 3 киши омон қолган, уларнинг икки нафари катта ёшли эркаклар ва бири 6 ёшли болакайдир.
Унинг қайд этишича, самолёт 19 нафар йўловчига мўлжалланганди. Ҳалокат вақтида самолётда қанча йўловчи ва экипажнинг неча нафар аъзоси бўлгани ҳақида аниқ маълумот йўқ.
Reuters агентлиги хабарига кўра, омон қолганларнинг бири италиялик шифокор бўлиб, у Жанубий Судандаги тижорий ташкилотлардан бирида ишлаган. Қайд этилишича, жароҳатланганлар айни вақтда Йироль шаҳрига етказилган, шифокор жарроҳлик столига ётқизилган.
