Бошқа мавзуларЖиззах вилоятининг туманларидан биридаги пахта пунктида 2018 йил 4 октябрь куни ёнғин келиб чиққан. Бу вақтда пахта ғарами устида ўнга яқин ишчи ишлаётган бўлган. Бу ҳақда телеграммдаги Niyozov News канали хабар қилди.
Олов тез тарқалиб, ишчилар аланга ичида қолгани айтилмоқда. Натижада ўнга яқин одам турли даражадаги куйиш билан Республика шошилинч тиббий ёрдам марказининг Жиззах вилояти бўлимига ётқизилган.
Куйганлардан тўрт нафарининг аҳволи оғирроқлиги сабабли реанимация бўлимига ётқизилган. Улар жарроҳлик операциясини бошдан кечиргани ҳақида маълумотлар бор. 5 октябрь куни ушбу беморлар умумий палатага чиқарилган.
Шифохона маъмурияти, вилоятдаги расмийлар мазкур ҳодиса юзасидан маълумот беришни исташмади. Фақат беморларнинг аҳволи айни пайтда яхши экани, жароҳатлар уларнинг ҳаётига хавф солмаётганини аниқлай олдик холос. Қурбонлар йўқ.
Катта эҳтимол билан ҳозир ёнғиннинг келиб чиқиш сабаблари ўрганилмоқда. Жиноят иши очилган бўлиши ҳам керак.
Ўзбекистон Бош прокурори айни пайтда Жиззахда экани ҳам вазият жиддий эканидан далолат беради. Бунгача О.Муродов Самарқандда экани айтилади.
