Россия барча русийзабонларга фуқаролик бермоқчи. Россия ҳукумати руслар ва рус тилида сўзлашувчиларга фуқароликка қабул қилишни соддалаштирувчи янги концепция қабул қилади. Бу ҳақида «Турон24″ нашри «Коммерсантъ” газетаси маълумотига таяниб хабар қилмоқда.
Россияда миграция сиёсати бўйича янги концепция ишлаб чиқилишига мамлакат атрофида “геосиёсий воқелик”нинг ўзгаргани сабаб бўлгани айтилмоқда. “Коммерсант”нинг манбаларининг таъкидлашича, “Россияга миллионлаб инсонлар керак”.
Янги концепцияда асосий эътибор Украина ва Беларусь фуқароларига Россия фуқаролигини олиш жараёнини соддалаштиришга қаратилган. Улар эндиликда рус тилидан имтиҳон топширишдан озод этилади.
Шунингдек, концепция “рус жамияти ва ўзига фойда келтиришни истаган”, лекин фуқаролик олишни мақсад қилмаган одамларни ҳам қамраб олади. Булар, асосан, Россия университетларида таълим олган юқори малакали хорижлик талабалардир.
Айни пайтда концепция имзолаш учун президентга юборилган. Мазкур концепцияни Путин Москвада 31 октябрь – 1 ноябрда бўлиб ўтадиган VI Россиялик ватандошлар бутунжаҳон конгрессида эълон қилиши кутилмоқда.