Бошқа мавзулар«Ўзбектелеком» 30 ноябрь куни бир неча катта баёнот берди — 1 декабрдан интернет тезлиги 10 баробарга ошади (кўпчилик буни сезмаганини айтмоқда), UzOnline харидорлари учун эса нарх икки баробар тушади (масалан, тезлиги 2 Мбит/с энг арзон чексиз интернет тарифи 88 минг сўмдан бошланяпти), провайдерлар учун эса нархни уч баробар пасаяди (яъни, 1 Мбит/с трафик 85 минг сўмдан сотилади — ҳа, провайдер бўлишдан кўра UzOnline абоненти бўлиш арзонроқ ва яхшироқ).
Бу ҳолат, албатта, маҳаллий интернет-провайдерларга маъқул келгани йўқ. Каттароқлари ҳали-ку жим турибди, бироқ майдароқлари ўз норозиликларини билдиришни бошлади. Жумладан, ISTV компанияси. Компаниянинг Telegram-каналида ёзилишича, «Ўзбектелеком» минбарлар ва пресс-релизларда «провайдерлар учун 1 Мбит/с нархи энди 85 минг сўм!» дегани билан, унинг менежерлари 1 Мбит/с нархи аслида 125 минг сўм эканини айтган. Яъни, ISTV’га трафикни шу нархдан сотиб олиш таклиф қилинган.
«Ўзбектелеком» мамлакатдаги бутун телеком бозорини йўқ қилиб, унда ўзининг тўлиқ монополиясини ўрнатмоқчи. Улар улгуржи харидорлар (провайдерлар)га 1 Мбит/с трафикни пресс-релизларда 85 минг сўмдан, хос суҳбатларда эса 125 минг сўмдан таклиф қиляпти. Айни вақтда, «Ўзбектелеком»дан интернет сотиб оладиган жисмоний шахсларга 1 Мбит/с тезликдаги интернетни 44 минг сўмдан таклиф қилмоқда… Ваҳоланки, бозор қонунларига кўра, улгуржи харидор маҳсулотни ҳар доим чакана нархдан кўра пастроқ баҳода олиши керак», — дейилади ISTV баёнотида.
«Аксарият провайдерлар ҳозирги вақтда қандай яшаш ва умуман қандай ишлаш кераклиги ҳақида бош қотирмоқда. Хусусан, биз ҳам 1 Мбит/с учун нархдаги 4,5 баробар, аниқроғи, 97,5 минг сўмлик фарқ билан қандай қилиб сиз, абонентларга арзон ва сифатли интернет тақдим этишимиз мумкинлигини тушуна олмаяпмиз… Монополия яхшиликка олиб келмайди, хусусий интернет-провайдерлар ва рақобатсиз эса барқарор, юқори тезликдаги ва арзон интернетга эришиб бўлмайди», — дея қўшимча қилинган ISTV баёнотида.
