Бошқа мавзуларХалқаро меҳнат ташкилоти Ўзбекистонда мажбурий меҳнат барҳам топаётганини эътироф этаётган бир пайтда, айримларнинг ўз вазифасини бажармай, уни ўзгаларга юклаётгани бунга соя солмасмикин?
Гап шундаки, Фарғона вилоятидаги 2-сонли наркология диспансерида беморлар муассасада тозалаш ишларини бажаришга жалб этилган.
Ҳолбуки, бундай ишларни бажариш учун муассасада санитар-фаррошлар мавжуд.
Бундан ташқари, мазкур муассасада беморларга озиқ-овқат берилиши қониқарсиз аҳволда. Шифокорлар ўз хизмат вазифаларини лозим даражада бажармагани натижасида даволаш ишлари сусайиб кетган. Муассаса ходимлари беморларга қўпол муносабатда бўлиб келган.
Диспансернинг мажбурий даволаш бўлимида жиддий қонун бузилиш ҳолатларига йўл қўйилганлиги кузатилди. Жумладан, муолажа хонаси кўздан кечирилганда, яроқлилик муддати ўтиб кетган дори воситаси беморларга ишлатилаётгани маълум бўлди.
Бу Олий Мажлиснинг Инсон ҳуқуқлари бўйича вакили (Омбудсман) томонидан Хоразм, Андижон, Фарғона, Наманган вилоятларидаги Соғлиқни сақлаш вазирлиги тасарруфидаги мажбурий даволаш муассасалари, руҳий-асаб касалликлари клиник диспансерлари, мурувват уйларида инсоннинг ҳуқуқ ва эркинликлари таъминланиши ҳолати юзасидан мониторинглар ўтказилганда аниқланган.
