Бошқа мавзуларЖорий йилнинг май ойида етиштириб берган аччиқ қалампир кўчатлари пулини халигача ололмаётган деҳқон дарди.
Қорақалпоғистон республикаси , Амударё тумани, “Тўлқин” овул-фуқаролар йиғинида турувчи Санжар Холбоев Тошкент шаҳри , Олмозор тумани, Зарқайнар кўчаси, 1 уйда рўйхатдан ўтган “GENERAL MACHINERY GROUP” МЧЖ билан аччиқ қалампир кўчатларини етказиб бериш учун шартнома тузади.
-Хар бир донаси 80 сўмдан жами 180 000 дона, умумий 14 миллион 400 минг сўмга шартнома туздик. Келишилганидек,
4 миллион 200 минг сўмни бўнак сифатида олдиндан тўлашди,- дейди Санжар.
Кўчатлар 20 майга, ўз вақтида маҳаллий фермерларга етказиб берилади.
Шартномада буюртмачи махсулотни олганидан кейин 10 кун ичида етиштирувчига қолган пул маблағини тўлиқ тўлаш мажбуриятини олади.
Агар бу муддат узрли сабабларсиз ўтказиб юборилса, буюртмачи ҳар бир ўтказилган кун учун тўланмаган миқдорнинг 0,4% фоизида жарима тўлаши кўрсатилади.
Ҳозир декабрнинг ўртаси. Тезда янги йил ҳам келади. Лекин бизга тўланмаган 10 миллион 200 минг сўмни “GENERAL MACHINERY GROUP” халигача ҳам бергани йўқ.
Ўзбекистон Бош прокуратураси порталига қилинган мурожаатга ҳам, Тошкент шаҳар прокуратурасидан ҳам қонуний ечим топилмайди..
21 ноябрда (№ 10 м/ 2936-18) Олмозор туман прокурорри Д. Зуфаров деҳқонга Тошкент шаҳар Олмозор туман иқтисодий ишлар бўйича судига мурожаат қилишни маслаҳат беради.
-Буюртмачи фермерлардан кўчатни етиштириб бермасидан олдин тегишли суммани ўз ҳисоб рақамига тушириб олди, лекин бизга халигача бир тийин ҳам бергани йуқ. Энди мен қора меҳнатим ҳаққини олишим учун Тошкент қатнашим керакми?– ўз-ўзига савол беради Санжар Холбоев.
Солижон Абдураҳмонов
