Бошқа мавзуларАввалроқ Нурсултон Назарбоев Қозоғистонда электр, газ, сув, бензин учун тарифларни пасайтириш ҳақида кўрсатма берганди. Ҳукумат ушбу топшириқ 2019 йил 1 январдан бажарилишини маълум қилганди. Ҳали бу ҳаммаси эмас экан.
Қозоғистон энергетика вазирининг 14 декабрдаги буйруғи билан, электр энергия тарифларининг энг юқори қийматлари тасдиқланибди. Энг эътиборли жиҳати, 2018 йил охирида тасдиқланган бу тарифлар 2025 йилгача ўзгармайди.
Масалан, «Астана-Энергия» акциядорлик жамиятида 1 киловатт-соат энергия нархи 4,87 тенге, Олмаотадаги 1-, 2-, 3-ИЭМлари, Қапчиғай ГЭС, Каскад ГЭСдаги 8,33 тенге, Экибастуз ГРЭСда эса 5,76 тенге этиб белгиланган. Нима бўлганда ҳам, электр нархи 2025 йилгача ошмайди.
«Ўзбекэнерго» қўшнилардан бунақасини кутмаганди», — деб киноя қиляпти @kurbanoffnet. Ҳар сафар нархларни ошириш арафасида «қўшниларда ундоқ, қўшниларда бундоқ» дейишарди, қўшнилар эса нархларни шартта 2025 йилгача музлатиб қўйишди.
«Харажатларни ҳисоблашда бунинг қанчалар қулайлигини тасаввур қиляпсизми, айниқса бизнес учун», деб қўшимча қилган у. Эслатиб ўтамиз, Ўзбекистонда ноябрь ойида электр энергия тарифлари ошди, 2019 йил 1 июнда яна ошади.
