Сирдарё вилояти маъмурий маркази Гулистон шаҳридаги Президент Шавкат Мирзиёев топшириғи асосида тўлиқ қайта реконструкция қилинган шаҳар истироҳат боғига кириш Янги йил байрами арафасида пуллик бўлгани ҳақида хабарлар пайдо бўлганди. Парк ўзини ўзи маблағ билан таъминлаш тизимига ўтказилгани учун, унга кириш 14 ёшгача бўлганлар учун 500 сўм, ундан катталар учун 1000 сўм этиб белгилангани айтилганди. Бу — бир муаммо.
Мамлакатнинг барча сайлгоҳларида бўлгани каби, Гулистон шаҳар истироҳат боғида ҳам Янги йилга байрамига бағишланган театрлаштирилган томошалар ўтказилиши табиий. Фақат бошқа жойлардагидан фарқли ўлароқ, Гулистон паркидаги бундай томоша пуллик, «Правда Востока» газетаси портали хабарига кўра, чипта нархи — 2000 сўм. Паркдаги аттракционларнинг пуллик бўлиши тушунарли, лекин паркнинг ўзига киришни ҳам, ундаги томошаларни ҳам пуллик қилиш — сал ғалати эмасми?
Боз устига, умуммиллий байрам арафасида. Тўғри, 1000—2000 сўм — арзимас пул. Лекин парк — жамоат дам оладиган бир жой. Паркка киришни пуллик қилгунча, аксинча, кўпроқ одамларнинг унга киришига йўл очиб, уларни парк ичида пул сарфлашга ундаган фойдалироқ эмасми?