Ногирон болаларни боққан ота-оналарга 2019-йилнинг 1-январидан бошлаб 4900 сомдан берилади. Бу ҳақда Қирғизистон Республикаси Меҳнат ва ижтимоий ривожлантириш вазири Улукбек Кочкоров маълум қилди.
– 1-январдан бошлаб ота-оналарга беш минг сомга яқин суммадаги ойлик берилади. Кейин катта ёшли биринчи гуруҳ ногиронларини қараган одамларга ҳам келажакда имкониятига яраша ойлик тўлашни кўриб чиқмоқдамиз, – деди у.
Маълум бўлишича, ногирон боласини боққан ота-онанинг меҳнати давлат томонидан расмий тан олиниб, кейинчалик нафақага чиқиш имкониятлари ҳам қаралган.
Қирғизистон Республикаси Меҳнат ва ижтимоий ривожлантириш вазирлигининг маълумоти бўйича ҳозирда мамлакатда 29,9 минг имконияти чекланган бола яшайди. Улардан 6 минг нафари доимий қаровга муҳтождир. Қирғизистонда имконияти чекланган болаларни тарбиялаган ота-оналарга ойлик тўлаб бериш, болани қараган йилларини меҳнат дафтарчасига ёзиш ҳақидаги муаммо 15 йилдан буён кўтарилиб, аммо масала ҳал бўлмай келарди.
Мирзоулуғбек Каримов тайёрлади