Жорий йилнинг 9 январь куни Тошкентда Президент Мирзиёев қабулхонаси олдида 5 нафар аёл пикет уюштирди. Аёллар Тошкент, Самарқанд ва Хоразм вилоятларидан бўлиб маҳаллий амалдорлар уларга ноҳақлик қилгани сабабли келганини айтишган, ва зудлик билан мамлакат Президенти қабул қилишини талаб қилишган. Бироқ уларни тинчлик пикетини фуқаролик кийимидаги қўриқчилар ва милиция ҳодимлари тўхтатишга уриниб, қўлидаги норозилик баннерларини тортиб олишган, шунингдек пикет иштирокчилардан бирининг қўл телефонини ҳам олиб қўйишган. Аёллар милицияга “Сизлар халқни қўриқлайсизларми? Ё амалдорларни қўриқлайсизларми?”, дея норозилигин билдирганига қарамай пикет иштирокчилари бўлган 5 нафар аёлни Яккасарой ИИБ олиб кетган.
Урганч шаҳрида истиқомат қилувчи 31 ёшли Нафосат Оллошукурованинг яқинларидан бирининг айтишича уни маҳаллий амалдорлар ва милиция ҳодимлари ижарада яшаётган уйидан ҳайдаб чиқиб, ноҳақ туҳматлар қилгани сабаб бўлган. У ўзининг Facebook саҳифасида унинг телефонини милиция олиб қўйиб, ундаги видеоларни ўчирганини ёзган. Шунингдек Facebook саҳифасида Мирзиёевнинг қўриқчилари ва милиция аёлларнинг пикетига қаршилик қилаётгани туширилган видеосини эълон қилган.
Яккасарой тумани суди аёлларнинг 4 нафарига минимал иш ҳаққининг 11 баробарида яъни 2 миллион сўм миқдорида жаримага тортган. Шунингдек Хоразмлик икки фарзанднинг онаси Нафосат Оллошукуровани безориликда айблаб 5 суткага ҳибсга олган.
Ўзбекистонда аҳолининг маҳаллий ҳокимлардан норозилиги ҳозирги кунда авжига чиққан, сабаби Президент Мирзиёевнинг телевидениедаги нутқи билан амалдаги ишлаши халқни норози қилмоқда. Шунингдек кун ора аҳолига турли туман солиқлар солиб, уни мажбурий ундиришлари халқнинг жиғига тегмоқда.
Эслатиб ўтамиз, 5 суткага ҳибсга олинган Нафосат Оллошукурова Ўзбекистон “Бирдамлик” Xaлқ Демократик партиясининг аъзосидир.