Бошқа мавзулар
Қўқондаги съёмка вақтида Ўзбекистон халқ артисти Пўлат Саидқосимовнинг тоби қочган. Унга зарур тиббий ёрдам кўрсатилиб, шошилинч равишда Тошкентдаги Республика шошилинч тиббий ёрдам илмий марказига олиб борилган, деб ёзмоқда телеграмдаги “Daryo—LIVE” канали.
Хасталанган актёрни Соғлиқни сақлаш вазири ўринбосари, Республика шошилинч тиббий ёрдами илмий маркази бош директори Абдуҳаким Хаджибаев кўрикдан ўтказиб, операция амалиётини амалга оширган. Мураккаб операция олти соат давом этган.
ЎзАнинг «аниқ берилган маълумотларга» таяниб хабар беришича, Пўлат Саидқосимовнинг аҳволи оғирлигича қолмоқда.
«Ҳозирда актёр Республика шошилинч тиббий ёрдами илмий марказининг жонлантириш бўлимида ётибди. Малакали шифокорлар унинг ҳаёти учун курашмоқда», — дейилади агентлик хабарида.
Пўлат Саидқосимов 1931 йилда Тошкент шаҳрида туғилган. 1954 йилда Тошкент театр ва рассомлик санъати институтини тамомлаган. Фаолиятини Ҳамза номидаги Ўзбек драма театрида бошлаган. «Муҳаббат можароси», «Абу Райҳон Беруний», «Чол ва набира», «Шайтанат» каби ўнлаб кино ва видеофильмларда роль ўйнаган.
1969 йилда Ўзбекистонда хизмат кўрсатган артист, 1979 йилда эса Ўзбекистон халқ артисти унвони билан тақдирланган. 2001 йили эса «Эл-юрт ҳурмати» ордени билан мукофотланган.
