Тошкент вилоятида ўтказилган семинарда вилоят ҳокими Ғуломжон Ибрагимов тадбирда қатнашаётган Ўзбекистон бандлик ва меҳнат муносабатлари вазири Шерзод Кудбиевга мурожаат қилиб, ундан 10 минг нафар қурувчи мутахассис тайёрлаб беришини сўрабди.
«Вилоят, айниқса маъмурий марказ — Нурафшон шаҳри улкан бунёдкорлик майдонига айланди. Узоқ йиллар давом этиши режалаштирилган йирик ҳажмдаги қурилиш жараёнига шунга яраша салоҳият зарур. Айни пайтда шу мақсадда шаҳарда тўртта қурилиш трести ташкил этилиб, моддий-техник базаси мустаҳкамланмоқда. Бу борада муаммо йўқ. Лекин бизга 10 минг нафар малакали қурувчи мутахассис керак», — дебди ҳоким.
«Ўз навбатида бандлик ва меҳнат муносабатлари вазири ишсиз аҳоли, айниқса, ёшларни ўқитиб, 10 минг нафар қурувчи тайёрлаб беришини маълум қилди», — дея хабар беряпти ЎзА. Қизиқ, бу 10 минг қурувчини қандай қилиб, қанча вақтда тайёрлаб беришаркин? Қурувчилар тайёрланди ҳам дейлик — маоши кўнгилдагидек бўлармикин?