Бошқа мавзуларПокистон ҳаво ҳудуди ёпилгани сабабли «Ўзбекистон ҳаво йўллари» Миллий авиакомпанияси харажатлари икки баробарга ортди, дея хабар қилди МАК вакили «Газета.uz» нашрига.
27 февраль куни Покистон Фуқаро авиацияси бошқармаси қарори билан Кашмир атрофида Ҳиндистон билан можаро кескинлашгани сабабли мамлакат ҳаво ҳудуди барча парвозлар (транзит) учун ёпилган. Мазкур тақиқ 12 мартга қадар давом этиши белгиланган.
Uzbekistan Airways компаниясининг Тошкентдан Ҳиндистоннинг Амритсар шаҳрига парвоз қилувчи самолёти Покистон ҳудудини четлаб ўтмоқда. Манба: Flightradar24.
МАК парвозларни Ҳиндистон (Деҳли, Амритсар, Мумбай) ва Жануби-Шарқий Осиё шаҳарларига (Бангкок, Куала-Лумпур, Сингапур) Покистон ҳаво ҳудудини айланиб ўтган ҳолда — Туркманистон ва Эрон орқали амалга оширишга мажбур бўлмоқда. Натижада парвозлар муддати узаймоқда, авиакеросин ва бошқа давлатлар устидан учиш харажатлари ортмоқда.
Мураккаб вазият вужудга келганига қарамасдан МАК бошқа авиаташувчилар каби келтириб ўтилган йўналишлардаги қатновларни бекор қилмади, дея қайд этди компания.
Чипталар нархи ошиши мумкинми, деган саволга МАК вакили агарда ҳаво ҳудуди ёпиқлигича қолса, «Ўзбекистон ҳаво йўллари» кўрсатиб ўтилган йўналишларда авиачипталар нархларини қайта кўриб чиқишга мажбур бўлиши мумкин дея жавоб берди.
