Бошқа мавзуларКосонсой туманининг Тагижар маҳалласида яшовчи И.М. муқаддам фирибгарлик жиноятига қўл ургани учун икки бор судланган. Бироқ бундан хулоса чиқармай, яна эски қилмишларини давом эттирди. Бу ҳақда Жиноят ишлари бўйича Наманган шаҳар суди судьяси Султонмақсуд Холботировга таяниб «Дарё» нашри маълум қилмоқда.
У 2018 йил 16 ноябрь куни Косонсой буюм бозори директорига қўнғироқ қилиб, ўзини прокуратура ходими Бекзод сифатида таништиради. Ҳозирда Тошкент шаҳрида ўқишдалиги, харажатлар учун 200 АҚШ доллари кераклиги, ўқишдан қайтганидан сўнг қайтариб беришни айтиб, пулни олади, бироқ қайтариб бермайди.
2018 йил 6 декабрь куни Тўрақўрғон туман тиббиёт бирлашмаси бош врачига қўнғироқ қилиб, унга ҳам ўзини прокуратура ходими Бекзод сифатида таништиради. Эски усул такрорланади: ўқишдалиги , 200 доллар зарур бўлиб қолганини айтади. Сўралган пулни бериб турса келгусида шифохонада прокуратура томонидан ўтказиладиган текширувларда қўллаб туришини айтади. Тиббиёт бирлашмаси бош врачи бу шартга гўёки рози бўлади ва тамагирлик ҳолати ҳақида ҳуқуқ-тартибот идорасига хабар беради.
Шундан сўнг тезкор тадбир уюштирилди. И.М. Наманган — Косонсой йўналишида киракашлик билан шуғулланувчи Б.Абдуллаев орқали Наманган шаҳар, 2-кичик тумандаги банк биноси олдида тадбир иштирокчисидан кимёвий ишлов берилган 1.600.000 сўмни олганда ушланди. Унга нисбатан жиноят иши очилиб, жавобгарликка тортилди.
Жиноят ишлари бўйича Наманган шаҳар судида ушбу жиноят иши кўриб чиқилиб, сохта прокурорга 3 йил озодликни чеклаш жазоси тайинланди. Жазони ўташ даврида қонунга хилоф ҳатти-ҳаракатлар содир этмаслик, ижтимоий фойдали меҳнат билан шуғулланиш, ИИБ розилигисиз яшаш ва иш жойини ўзгартирмаслик, Ўзбекистон ҳудудидан ташқарига чиқмаслик каби қатор чекловлар ўрнатилди.
Қизиқ томони шундаки, Наманганда ўтган гал қўлга олинган сохта прокурор ҳам ўзини «Бекзод» сифатида таништирган ва у ҳам Тўрақўрғон туман тиббиёт бирлашмаси бош врачи иштирокида ушланганди.
