Бошқа мавзуларТошкент яқинида Бош имом-хатиб ва масжид мутавалласи ўзаро жиноий тил бириктириб, эҳсон қутисидаги пулларни ўзлаштириш билан шуғулланиб келишгани аниқланди, деб ёзади «Жаҳон.уз» нашри.
Тошкент вилояти Нурафшон шаҳар “Тўй-тепа” нодавлат-нотижорат ташкилоти Бош имом-хатиби Жобир Турғунов (исм-фамилиялар ўзгартирилган) ва “Тўй-тепа” жоме масжиди мутаваллиси Носир Ғуломовнинг ўзаро жиноий тил бириктириб, сохта расмий ҳужжатлар тузишади.
Улар жоме масжиди ҳайъат аъзоларининг умумий йиғилиши ўтказилмаган бўлса-да, уни ўтказилди, йиғилишда Н.Ғуломов масжид мутаваллиси бўлиб қайта сайланди, деб сохта баённома расмийлаштиришади. Хуллас, аслида бўлмаган йиғилишда гўёки мутаваллини қайта сайлаб олишади.
Бир мақсад йўлида бирлашган имом-хатиб ва мутавалли масжид ҳудудидаги иккита эҳсон қутиси ёнига яна тўртта қўшиб, олтита қилишади. Аммо қўшилган эҳсон қутилари бўйича ҳеч қаерга ҳисобот беришмайди. Ёпиғлик қозон ёпиғлигича қолаверади. Вақти-вақти билан эса Нурафшон шаҳар давлат солиқ инспекциясига масжидда фақатгина иккита эҳсон қутиси борлиги ҳақида сохта маълумотнома тақдим этиб туришади.
Савобталаб инсонларнинг эҳсонлари имом-хатиб ва мутаваллига буюрмади. Ж.Турғунов мутаваллига ҳисобга олинмаган эҳсон қутисидаги пулларни вақф фондига топширмасликка кўрсатма беради. Аниқланишича, икковлон дастлаб ушбу эҳсон қутиларига тушган қарийб 22 миллион сўм пулнинг 5 миллион сўмдан ортиғини масжид учун ишлатиб, қолганини растрата йўли билан талон-тарож қилишади.
“7news.uz”га юборилган ва бизнинг ихтиёримизида бўлган ҳужжатларда, Департаментнинг Нурафшон шаҳар бўлим ва солиқ инспекцияси ҳамкорлигида шаҳар жоме масжидида ўтказилган текширишда имом-хатиб хизмат хонасидаги сейфдан вақтида вақф фондига топширилмаган 13 миллион сўмдан зиёд, рўйхатдан ўтказилмаган 4 дона эҳсон қутисидан эса 800 минг сўмдан ортиқ пуллар ашёвий далил сифатида олинган.
Суриштирув жараёнида Ж.Турғунов ва Н.Ғуломов ўзаро жиноий тил бириктириб, жоме масжидига эҳсон қилинган 37 миллион 730 минг сўм пулни талон-тарож қилганликлари маълум бўлди.
Департаментнинг Тошкент вилоят бошқармаси катта инспектори Гулчеҳра Раззоқованинг маълум қилишича, Ж.Турғунов ва Н.Ғуломовнинг жиноий хатти-ҳаракатларига жиноят ишлари бўйича Нурафшон шаҳар суди томонидан ҳуқуқий баҳо берилиб, уларга тегишли жазо тайинланди.
