Бошқа мавзуларБугун, 12 август куни соат 12:40 да Андижон вилояти Улуғнор тумани Сариқсув МФЙ ҳудудида жойлашган “Виктория газ сервис” МЧЖга қарашли автомобилларга газ тўлдириш компрессор шохобчасининг 6-колонкасида ёнғин чиққан. Бу ҳақда Давлат ёнғин хавфсизлиги хизмати хабар қилди.
Газ тўлдираётган 2 та автомобиль олов ичида қолиб, бутунлай ёниб кетган.
Ёнғин оқибатида шохобчада газ тўлдираётган фуқаро Х.Х.га тегишли “Дамас” русумли автомобилида ёнғин содир бўлган. Аланга унинг орқасида, навбатда турган фуқаро Ж.Ғ.га тегишли “Дамас” русумли автомобилига ўтиб кетиши сабаб иккала машина тўлиқ ёниб зарарланган.
Ёнғинни бартараф этишга 2 та ёнғин ўчириш бўлинмалари жалб этилган. Бўлинмалар воқеа жойига етиб боргач соат 13:00 да олов тўлиқ бартараф этилган. Ёнғинни кенг майдонга тарқалиб кетишининг олди олинган.
Ҳозирда ёнғин сабаби ва моддий зарар миқдори аниқланмоқда.
