Бошқа мавзуларГонконгда ўтган навбатдаги норозилик акциясида полиция намойишчиларни тарқатиш учун биринчи марта ўқотар қуроллардан фойдаланди, деб «Коммерсантъ» хабарига асосланиб “Дарё” ёзмоқда.
Гонконгдаги норозилик намойишлари 1 октябрь Хитой Халқ Республикаси ташкил этилганининг 70 йиллигини нишонлаш муносабати билан ўтказилмоқда. Фаоллар «ҳокимиятни халққа қайтариш»га чорламоқда.
Намойишчилардан бири яраланган, у касалхонага ётқизилди. Полициячилар, шунингдек, кўздан ёш оқизувчи газ қўллашга ҳам мажбур бўлган. 30 нафар намойишчи ҳибсга олинган.
Ўқотар қуролдан яраланган ёш йигит кардиожарроҳлик марказига олиб кетилган. У кўкрагидан жароҳат олган, унинг аҳволи ҳақида ҳозирча ҳеч қандай маълумот йўқ.
Қайд этилишича, ҳаммаси бўлиб 15 киши яраланган, улардан бирининг аҳволи ўта оғир дея баҳоланмоқда.
Акциялар март ойининг охирида, митингчилар фикрича, Хитойдан Гонконгга қочиб кетган диссидентлар ва мухолифатчиларга қарши қаратилган экстрадиция қонуни туфайли бошланди.
4 сентябрь Гонконг раҳбари Керри Лам қонунни бекор қилишни эълон қилганди, аммо акциялар ҳали ҳам давом этмоқда.
