China Eastern авиакомпаниясига тегишли Boeing 737 йўловчи самолёти Хитой жанубида ҳалокатга учради. Бу ҳақда 21-март куни Хитой марказий телевидениеси хабар берди.
Хитойнинг Гуанси-Чжуан автоном туманига қарашли Учжоу шаҳрининг Тен округида бортида 133 нафар йўловчи бўлган China Eastern Airlines авиакомпаниясининг Boeing 737 йўловчи самолёти ҳалокатга учради.
Flightradar24 агентлигининг маълумотларига кўра, MU5735 рейсидаги самолет Кунминьдан маҳаллий вақт билан 13:15 да ҳавога кўтарилиб, Гуанчжоуга йўл олган. Тахминан 14:20 да самолётнинг Узжоуда тезлиги кескин пасайиб, йўналишини йўқота бошлади. Кейин у радар экранидан ғойиб бўлди. Ҳалок бўлганлар сони номаълум. Воқеа жойида қидирув-қутқарув ишлари олиб борилмоқда. Шунингдек, ҳалокат жойида ўрмон ёнғини содир бўлганини ҳам Хитой ОАВ-лари хабар қилмоқда.