“Давлатга хиёнат қилди” деб айбланган Порошенко Киевга келди

Украинанинг собиқ президенти Пётр Порошенко Украинага келди. 17 январь куни мухолифатдаги сиёсатчи ўтирган самолёт Варшавадан Киевнинг Юлия аэропортига қўнди.

Божхона назорати хизмати Порошенконинг паспортини мусодара қилиб, оммавий норозиликдан кейин уни қайтариб беришга мажбур бўлган, сиёсатчи ва у билан бирга келганлар чегарадан ўтказилди.

Собиқ президентни аэропортда юзлаб тарафдорлари кутиб олди.

Порошенко ўтган йилнинг декабрь ойида давлатга хиёнат қилиш ва терроризмга ёрдам беришда айбланган эди.

Бугун, 17-январь куни Киевнинг Печерск туман суди Порошенкони ҳибсга олиш ёки олмаслик масаласини кўриб чиқади. Прокурорлар 1 миллиард гривна (тахминан 36 минг доллар) гаров пули талаб қилмоқда. Уй қамоғига ҳам олиниши мумкин. Бироқ Порошенконинг ўзи ҳибсга олинмаслигига ишончи комил эканлигини айтган.

Тергов маълумотларига кўра, Порошенко президентлиги даврида, 2014-йилда россияпараст айирмачилар назоратидаги Донбасс ҳудудидан кўмир қазиб олиш бўйича келишувга эришилган. Собиқ президент “давлатга хиёнат” ва “терроризмни молиялаштириш”да айбланмоқда.

Порошенко жиноий иш очилгандан сўнг мамлакатни тарк этган. Бироқ унинг хизмат сафарида эканлиги ва кейинроқ қайтиши хабар қилинганди.

Мамлакатдаги энг йирик “Европейская солидарность” мухолифат партияси раҳбари Порошенко бу айбловларни рад этади.