Украинанинг рақамли трансформациялар вазири Михаил Федоров 15-февраль куни маҳаллий вақт билан соат 20:00да мамлакатнинг давлат серверлари ва банкларига хакерлик ҳужуми содир бўлганини маълум қилди.
Ҳужум Ўзбекистон ҳудудидан ҳам қилинган.
“Ҳужумларни Россия ва Хитойдан бошлаган. Бир сонияда таҳминан 600 000 пакетга яқин зарарли трафик юборилган. Мутахассисларимиз бу ҳужумларни тезда қайтаришди. Бироқ кейинги ҳужумлар Чехия ва Ўзбекистон орқали амалга оширилди. Бу ҳужумлар ҳам блокланди. Фойдаланувчилар бу ҳужумни сезгани йўқ”, деди Федоров ўзининг Telegram каналида.
Вазирнинг айтишича, Украина Мудофаа вазирлиги, Қуролли кучлар, Приватбанкнинг ва Ошадбанкнинг сайтлари ҳам DdoS ҳужумига учраган.
15-февраль куни Украинанинг Мудофаа вазирлиги бошчилигидаги қатор давлат идоралари ва банклари веб-сайтлари киберҳужумга (DDoS) учради. Associated Press хабарига кўра, Украинада камида ўнлаб веб-сайтлар хакерлик ҳужумига учраган.
Украина ҳукуматининг расмий баёнотида, ҳужум ортида ким тургани айтилмаган бўлса-да, Россиядан шубҳаланаётганига ишора қилган.