Афғонистондаги “Толибон” ҳаракати Россия ва Украинани қўшма мулоқот бошлашга ва можарони тинч йўл билан ҳал қилишга чақирди. Бу ҳақда Афғонистон Ислом Амирлиги ташқи ишлар вазирлиги матбуот котиби Абдул Қаҳҳор Балхий Twitterда маълум қилди.
Унинг сўзларига кўра, Украинада тинч аҳоли орасида қурбонлар сони ортиб бораётганини кузатиб бораётган Афғонистон Ислом Амирлигини хавотирга солмоқда.
“Умид қиламизки, иккала томон ҳам босиқлик кўрсатади. Барча томонлар зўравонликнинг кучайишига олиб келадиган қадамлар қўйишдан тийилиши керак.
Афғонистон Ислом Амирлиги ўзининг бетарафлик ташқи сиёсатига мувофиқ, можаронинг ҳар икки томонни ҳам мулоқот ва тинч йўл билан ҳал қилишга чақиради”, дейилади баёнотда.
Абдул Қаҳҳор Балхий Украинадаги афғон талабалари ва муҳожирларининг хавфсизлигини таъминлаш масаласини ҳам кўтарди.