Бошқа мавзуларХитой раҳбари Си Цзиньпин жума куни Жо Байден билан ўтказилган музокараларидан сўнг Пекин ва Вашингтон халқаро хавфсизликни сақлаш учун биргаликда жавобгар бўлиши кераклигини айтди. Биринчи марта у Украинадаги ҳарбий можарони бевосита қоралади, лекин у буни юмшоқ тарзда етказди. Бу ҳақда Хитой давлат телевидениеси хабар берди.
“Давлатлараро муносабатлар ҳарбий можаро даражасига тушмаслиги керак”, – деди Си Цзиньпин.
Тинчлик ва хавфсизлик халқаро ҳамжамиятнинг энг қиммат бойлигидир. “Украина инқирози Хитой кўргиси келадиган нарса эмас”, – дея қўшимча қилди у.
Пекин шу кунгача Россиянинг Украинага қарши тажовузини бир томонлама қораламаган ва умуман нейтрал позицияни эгаллаган. Хитой БМТ Бош Ассамблеясининг ишғолни қораловчи резолюциясини қўллаб-қувватламади, лекин қарши ҳам бўлмади: Пекин вакили бетараф қолди.
“Ҳозирги асосий устуворликлар – мулоқот ва музокараларни давом эттириш, тинч аҳоли орасида қурбонларни олдини олиш, гуманитар инқирознинг олдини олиш, ҳарбий ҳаракатларни тўхтатиш ва урушни имкон қадар тезроқ тугатиш”, — деди у Байден билан ўтказилган музокаралардан сўнг.
