Иккинчи жаҳон уруши концлагерларидан омон қолган 96 ёшли Борис Романченко Россия ҳарбийлари Украинанинг Харьков шаҳрини бомбардимон қилиши оқибатида ҳалок бўлди. Бу ҳақда Бухенвальд ёдгорлик мажмуасининг маъмурияти унинг набирасига таяниб маълум қилди.
18-март куни Романченконинг квартираси жойлашган кўп қаватли уйга бомба келиб тушган..
Романченко 1942 йилда нацистлар томонидан асирга олинган ва биринчи марта Германиядаги Бухенвальд концлагерига қамоққа олинган. Кейинги уч йил давомида у Пенемюнде, Дора-Миттелбау ва Берген-Белсен лагерларида сақланган.
Бухенвальд мажмуаси маъмуриятининг сўзларига кўра, Романченко одамларга нацистларнинг жиноятларини эслатиш учун кўп иш қилган. У охирги пайтларда Бухенвальд-Дора халқаро қўмитаси вице-президенти бўлган эди.