Украинадаги уруш: Россия қўшинлари чиқиб кетган ҳудудлардаги ҳозирги вазият

Бугун Украинада уруш бошланганига 39 кун бўлди. Украина расмийларига кўра, Киев вилоятидан барча рус қўшинлари олиб чиқиб кетилган.

Россия қўшинлари ташлаб кетган Киев яқинидаги Буча шаҳрида тинч аҳолининг жасадлари топилмоқда. Ғарб матбуотининг ёзишича, 20 кишининг жасади кўчадан топилган. «Франс Пресс» агентлиги билан суҳбатда Буча шаҳри мэри 280 нафар жасад топилганини ва дафн этилганини айтди.

Human Rights Watch ташкилоти Бучада рус аскарлари томонидан ҳарбий жиноятлар содир этилди дея айблаб чиқди. Ташкилотнинг айтишича, бунга далил бор. Россия Мудофаа вазирлиги ҳозирча вазиятга изоҳ бермади.