Қозоғистонда 9-май – Ғалаба кунида ҳарбий парад ўтказилмайди. Бу ҳақда Қозоғистон Мудофаа вазирлиги матбуот хизмати хабар берди.
Маълумотларга кўра, мамлакатда 7-май куни нишонланадиган Ватан ҳимоячилари куни ҳам тантанали равишда нишонланмайди.
“2022-йилда Қозоғистон Қуролли Кучларининг 30 йиллиги ва 1941-1945 йиллардаги Улуғ Ватан урушидаги Ғалаба куни муносабати билан ҳарбий парад ўтказилиши режалаштирилмаган”, — дейилади хабарда.
Мудофаа вазирлиги 2022-йилда парад ўрнига 50 га яқин ҳарбий-ватанпарварлик тадбирлари ўтказилишини маълум қилди. Улар Қозоғистоннинг турли вилоятларида ташкил этилади. Хусусан, мамлакат бўйлаб Улуғ Ватан уруши ва Қуролли Кучлар фахрийларини байрам билан табриклашади.
Эслатиб ўтамиз, Қозоғистонда кетма-кет учинчи йил ҳарбий парад тўхтатилди. 2020-2021-йилларда пандемия туфайли маросим ўрнига ҳарбий гарнизонларда хотира тадбирлари ўтказилган.