Бошқа мавзуларБирлашган Миллатлар Ташкилотининг экспертлар гуруҳи Тоғли Бадахшон вилоятида кескинлик кучайиб бораётганидан хавотир билдириб, Тожикистон ҳукуматини “Помирдаги озчилик”ни ҳимоя қилишга ва минтақада инсон ҳуқуқларини ҳурмат қилишга чақирди.
«Биз намойишларни бостиришга уринишлар, Помир аҳолисининг ҳибсга олиниши ва ҳаддан ташқари, ноқонуний ҳарбий куч қўлланилишидан чуқур хавотирдамиз. Биз ҳукуматни помирлик намойишчиларга нисбатан камситишларни тўхтатиш чораларини кўришга чақирамиз», – деб ёзилган БМТнинг Инсон ҳуқуқлари бўйича Олий комиссарининг сайтида.
Тожикистон ҳукумати ҳозирча бу борада изоҳ бермади. Аввалроқ расмий Душанбе Тоғли Бадахшонда уюшган жиноятчиликка қарши курашаётганини билдирган эди.
Хорогдаги вазият ўтган йилнинг 25-ноябрида кескинлашган. У ердаги ҳарбийларнинг операцияси давомида маҳаллий фуқаро Гулбиддин Зиёбеков ўлдирилган. Шу муносабат билан Хорог халқи тўрт кун давомида норозилик намойиши ўтказган.
Улар ҳукумат Зиёбековнинг ўлимини текширишини, намойишчиларни таъқиб қилмаслигини ва интернетни очишга ваъда берганидан кейингина тарқалган. Ҳозир улар тергов ишлари қониқарли олиб борилмаётгани айтиб нолишмоқда.
