Бошқа мавзулар
АҚШ президенти Жо Байден Конгрессдан Украинага 33 миллиард доллар ёрдам беришни сўраганини айтди. 28-апрелда Оқ уйда сўзлаган президент Қўшма Штатлар Украинани Россия агрессиясига қарши курашда қўллаб-қувватлашда давом этишини, қурол-яроғ таъминотини оширишини айтди.
Байденга кўра, жиддий ҳаракат қилишга, юқори нархларга қарамай, тажовузкорни тўхтатиш керак. АҚШ раҳбарининг айтишича, агар Россия президенти Владимир Путинга Украинани мағлуб этишга рухсат берилса, унинг тажовузкорлиги янада кучаяди.
Байден Украинага ёрдам бериш орқали АҚШ Россияга ҳужум қилмаганини, балки босқинчиликка қарши туришга шароит яратишини таъкидлайди. Президент Вашингтон Украинага қўшин киритмаслигини, балки ҳамкорлар билан артиллерия ва танклар каби оғир қуроллар етказиб бериш ҳажмини оширишга ҳаракат қилишини яна бир бор таъкидлади.
Шунингдек, у Россия Украинада ўз мақсадларига эришмаётганини ҳис қилаётганини, Путин эса уни ядро қуроли билан таҳдид қилаётганини айтди.
Россия президенти ядровий қурол масаласида тўғридан-тўғри мурожаат қилмагани билан чоршанба куни Россияга Украинадан “стратегик таҳдид” юзага келса, «яшин каби тез ҳужум қилишини» эслатган.
Байден сўраган 20 миллиард доллар Украина ва қўшни давлатларга ҳарбий ёрдамга йўналтирилмоқчи, 8,5 миллиард доллар Киевга иқтисодиётни юксалтиришга, 3 миллиард доллар гуманитар ёрдамга йўналтирилади.
