Бошқа мавзуларУкраина Ташқи ишлар вазирлиги Киевдаги фаолиятини тиклаган элчихоналар рўйхатини эълон қилди. 38 давлатнинг дипломатик ваколатхоналари қаторига Ўзбекистон ҳам киради.
“Бу ҳамкорларимиз Украина ғалабасига ишонишининг яна бир далилидир”, — дейилади Украина ТИВ Фейсбукдаги саҳифасида.
Россиянинг Украинага бостириб кирганидан кейин дунё давлатларининг, жумладан Ўзбекистоннинг элчихонаси мамлакат ғарбига – Львовга кўчирилган эди. Мамлакатда ишлаётган ва яшаётган юзлаб ўзбекистонликлар ўз ватанларига ёки бошқа хавфсиз ҳудудларга кўчирилган.
Россия 24-февралда Украинага бостириб кирган. Ўшандан бери Украинада минглаб тинч аҳоли ва аскарлар ҳалок бўлди. Бирлашган Миллатлар Ташкилоти маълумотларига кўра, 5 миллиондан ортиқ украиналик ўз уйини тарк этиб, қочқинликда ҳаёт кечирмоқда.
