Бошқа мавзуларУкраина президенти Владимир Зеленский мамлакат суверенитетини ҳимоя қилиш учун Россия етакчиси Владимир Путин билан музокара қилиш кераклигини айтди. Украина-Россия делегациялари охирги марта 29-март куни Истанбулда юзма-юз учрашган эди. Музокаралар онлайн давом этиб, кўп ўтмай бутунлай тўхтаб қолгани маълум бўлган.
Зеленский 27-май куни Индонезия таҳлил марказига қилган мурожаатида Украина Путин билан гаплашишни истамаслигини, бироқ ҳақиқатдан келиб чиқиб, урушни тугатиш учун шундай қадам қўйишга тўғри келиши мумкинлигини айтди.
«Биз бу учрашув билан нимани мақсад қиламиз? Биз суверен давлат ўз ҳудудида ҳаётни тиклашини истаймиз», – деган Зеленский, Россия ҳали жиддий тинчлик музокараларига тайёр эмаслигини қўшимча қилди.
Зеленский Москвани жаҳондаги озиқ-овқат инқирозидан қурол сифатида фойдаланаётганини ҳам танқид қилди. Аввалроқ Россия Ғарб айрим санкцияларни олган тақдирдагина Украинага денгиз орқали буғдой экспорт қилишига рухсат беришини айтган эди.
27-майда Зеленскийнинг баёнотига Кремл матбуот котиби жавоб бераётиб, Киевнинг «нима қилмоқчи бўлаётгани ноаниқ эканини» такидлади.
«Украина раҳбарияти доимий равишда бир-бирига қарама-қарши баёнотлар бериб келмоқда. Биз Украина томони нимани хоҳлаётганини тўлиқ тушунмаяпмиз», – деди Кремл матбуот котиби Дмитрий Песков.
