Бошқа мавзуларЛатвия Электрон оммавий ахборот воситалари миллий кенгаши Россиянинг 80 та телеканалини мамлакат ҳудудида кўрсатишни 6-июнь куни тақиқлади. Аввалроқ Латвияда Россия федерал каналлари кўрсатилмай қолган.
Миллий кенгаш раҳбари Ивар Аболиньш LETA агентлигига билдиришича, янги қонунга кўра, бошқа давлатнинг мустақиллиги ва ҳудудий яхлитлигига таҳдид солувчи мамлакатда рўйхатдан ўтган каналлар Латвияда кўрсатилмайди.
Қарор 9-июндан кучга киради ва Россия урушни тўхтатиб, Қримни Украинага қайтармагунча давом этади.
Шу куннинг ўзида Электрон оммавий ахборот воситалари миллий кенгаши “Дождь” канали учун лицензия беришга қарор қилди. Телеканалнинг таҳририяти ўн йилдан ортиқ вақтдан бери Москвада фаолият юритиб келади. Бироқ март ойи бошида у «Фейк тўғрисида»ги қонун туфайли эфирни тўхтатишга мажбур бўлган.
9-июндан бошлаб телеканал Латвиядан ўз эфирини бошлаши маълум бўлди. «Дождь» раҳбарияти ҳозирча бу борада расмий баёнот тарқатмади.
