Россия армияси тунда Украинанинг Змейний оролига ҳужум қилганини маълум қилди. Мудофаа вазирлиги матбуот котиби Игорь Конашенковнинг айтишича, у ерда байроқни тикишга уринган украиналик аскарларнинг бир қисми «йўқ қилинган».
Одесса вилояти маъмурияти бошлиғи Сергей Братчук зарба ҳақидаги маълумотни тасдиқлаб, бироқ қандай зарар олиб келганини айтмади.
Қора денгизнинг шимоли-ғарбий томонида жойлашган Змейнийни рус аскарлари уруш бошланган 24-февралда босиб олиб, 30-июнда Украина артиллерияси томонидан кучли ўққа тутилганидан кейин чекинишга мажбур бўлган. Одесса портига яқинлиги туфайли орол стратегик аҳамиятга эга.
7-июлда украиналик уч нафар аскар оролга давлат байроғини кўтараётгани акс этган видео расмий телеграм каналларида тарқалди. Видео қачон суратга олингани номаълум.