Ислом Каримов тўртинчи бор президентликка номзод

Ўзбекистон Тадбиркорлар ва ишбилармонлар ҳаракати – Либерал-демокоратик партия шу йилнинг март ойига белгиланган президентлик сайловига амалдаги президент Ислом Каримов номзодини илгари сурди.

Январь охирида 77 ёшга тўладиган Ислом Каримов Ўзбекистонни 1989 йилдан бери бошқариб келади.

Ўзбекистон мустақиллика эришганидан кейин илк президентлик сайлови 1991 йилнинг декабрида ўтказилган ва ўшанда Ислом Каримов ютиб чиққан. 1995 йилнинг мартида эса умумхалқ референдуми ўтказилиб, унинг президентлик ваколати 2000 йилга қадар узайтирилди.

2000 ва 2007 йилларда ўтказилган сайловларда Ислом Каримов 7 йиллик муддатларга сайланди. Чунки мамлакат Конституциясининг 90-моддасига ўзгартириш киритилиб, президентлик муддати 5 йилдан 7 йилга узайтирилган эди.

2011 йил декабрида эса “Ўзбекистон Республикаси Конституциясининг 90-моддасига тузатиш киритиш тўғрисида”ги қонун қабул қилиниб, президентлик муддати 7 йилдан 5 йилга туширилди.

Конституциянинг 90-моддаси нега ўзгараверганини тушуниш қийин эмас: ушбу моддага кўра бир шахснинг кетма-кет икки мартадан ортиқ президентликка сайланиши тақиқланади.

Шундай қилиб, Ислом Каримов бир марта 5 йилга президентликка  сайланди, кейин унинг ваколати 5 йилга узайтирилди, икки марта 7 йиллик муддатларга сайланди. Хулоса қиладиган бўлсак, Ислом Каримовнинг гўёки яна 5 йилга сайланиш ҳуқуқи бор.

Собиқ совет мамлакатлари мустақиллика эришганидан кейин фақатгина Ўзбекистон ва Қозоғистонда президент ўзгаргани йўқ.