Туркманистонда давлат харажатлари камайтирилади

Табиий газ экспорти ҳажми камайгани сабабли, Туркманистон ҳукумати давлат харажатларини камайтиришга мажбур бўлмоқда. Бу ҳақда Туркманистон иқтисодий ривожланиши вазирлигидаги манбага асосланиб, 12news.uz хабар берган.

Манбанинг таъкидлашича, жорий йилда Туркманистон газининг йирик хорижий харидори сотиб оладиган одатдаги 10 млрд кубометр газни 4 млрд кубометргача камайтирмоқда.

Газ экспортидан келадиган даромаднинг камайиб кетиши сабабли куни-кеча Туркманистон президенти Гурбангули Бердимухамедов давлат харажатларининг умуммиллий даражада камайтирилишини эълон қилди ҳамда амалдорларга бу йилда қурилиши режалаштирилган давлат объектлари рўйхатини бошқатдан кўриб чиқишни буюрди, деб хабар берган “Олтин аср” телеканали.

Маълумот учун, «Газпром» компанияси бошқарув раиси ўринбосари Александр Медведев Туркманистондан олинадиган газ ҳажми 10 млрд кубометрдан 4 млрд кубометргача камайтирилганини маълум қилган.