Ўтган йили Россиядан Ўзбекистонга пул ўтказмалари ҳажми 5,581 миллиард долларни ташкил этди, бу 2013 йилдаги кўрсаткичдан (6,633 млрд) 15,86 фоизга камдир. Мазкур маълумотлар Россия марказий банки томонидан келтирилган.
Бир пул ўтказмасининг ўртача суммаси ҳам 5 фоизга камайди ва 563 долларга тенг бўлди.
Ўзбекистондан Россияга пул ўтказмалари ҳажми эса 16,8 фоизга кўпайиб, 658 миллион долларга етди. Аммо бир пул ўтказмасининг ўртача суммаси 1,31 фоизга камайган ва 1876 долларга тенг бўлган.
2014 йил натижаларига кўра, Ўзбекистон ва Россия ўртасидаги умумий пул ўтказмалари ҳажми 6,239 миллиард долларни ташкил этди. 2013 йилда эса бу кўрсаткич 7,196 миллиард доллар эди (пасайиш – 13,29 фоиз).