Эмомали Раҳмонга “Миллат отаси” мақоми беришмоқчи

Тожик давлат педагогика университети ректори Носиржон Салимий ва олим  Холмаҳмади Самеъ мамлакат аҳолисига мурожаат қилиб, президент Имомали Раҳмонга расман “миллат отаси” деган номни бериш таклифи билан чиқишди.

Уларнинг фикрига кўра, ушбу мақом нафақат Имомали Раҳмоннинг миллат олдидаги хизматларининг эътирофи бўлади, балки бирдамлик ва тараққиёт омили сифатида хизмат қилади.

Мурожаатда айтилишича, аслида Имомали Раҳмон каби шахслар учун тасдиқнинг кераги йўқ, лекин “цивилизациялар, манфаатлар ва глобаллашув тўқнашувлари шароитидаги мамлакатларда халқлар расман тан олинган етакчиларга эҳтиёж сезади”.

Мурожаат ҳукмрон халқ демократик партиясининг расмий сайтида эълон қилинган.

Шундоқ ҳам Тожикистон президентига “миллат отаси” ва “пешво” деган нисбатлар ишлатилади, шунингдек, унга “жаноби олий” деб мурожаат қилишади.

Имомали Раҳмон Тожикистонни 1992 йилдан бери бошқариб келмоқда.

Эслатиб ўтамиз, Қозоғистон президенти Нурсултон Назарбоевга “элбоши”, Туркманистоннинг марҳум раҳбари Сафармурод Ниёзовга эса “туркманбоши” мақоми берилган. Ўзбекистонда эса Ислом Каримовга нисбатан кўпинча “юртбоши” нисбати ишлатилади.