Бошқа мавзулар
Бугун АҚШнинг Ўзбекистондаги элчихонаси Андижон воқеаларининг ўн йиллиги муносабати билан баёнот тарқатди.
“2005 йил 13 майда Андижонда юз берган воқеаларнинг ўн йилиги муносабати билан Америка Қўшма Штатлари ўша воқеалар туфайли ҳалок бўлган ёки жабр чекканларнинг оила аъзолари ва яқинларига чуқур ҳамдардлик изҳор этади. Биз Ўзбекистон билан кўплаб муштарак мақсадларга эгамиз ҳамда жавобгарлик, ярашув, демократик ислоҳотлар ва инсон ҳуқуқларини ҳимоя қилишни рағбатлантиришга содиқ қоламиз. Қўшма Штатлар Ўзбекистонни инсон ҳуқуқлари бўйича миллий ва халқаро мажбуриятларини тўлиқ бажаришга чақиришда давом этмоқда”, – дейилади баёнотда.
Халқаро ташкилотлар ва ҳуқуқ фаоллари Ўзбекистон ҳукуматини 2005 йилнинг 13 май куни Андижонда тинч намойишчиларга нисбатан қурол қўллаганликда айблаб келади. Расмий маълумотларга кўра, ўша куни Андижон воқеаларида 187 киши ҳалок бўлган ва ўлганларнинг кўпчилиги қуролли шахслар бўлган. Ўзбек ҳукумати ушбу воқеалар бўйича халқаро мустақил текширув ўтказилишини рад этиб келади.
