Бошқа мавзулар
Конгресс аъзоси сифатида инсон ҳуқуқлари тарғиботини устувор вазифа сифатида кўрган Том Лантос номига қўйилган махсус комиссия Ўзбекистон аҳлига Андижон фожиасининг 10 йиллиги билан ҳамдардлик билдириб, республика ҳукуматини эркинликларни эъзозлашга ундамоқда.
Ўша машъум кунда ҳукумат кучлари томонидан юзлаб бегуноҳ инсонлар отиб ўлдирилган ва давлат бунинг учун жавобгарликни ўз бўйнига олмай келади, дея танқид қилади Лантос комиссияси.
Демократ қонунчи Жеймс Макговерн ва республикачи қонунчи Жозеф Питтс раислик қиладиган бу орган назарида ҳалок бўлганлар коррупция, репрессия, қашшоқлик ва адолатсизликдан нолиб кўчага чиққан оддий фуқаролар бўлган. Ўзбекистон ҳукумати бу воқеа мустақил равишда текширилиши учун имконият яратиб бериши керак, дейди Америка қонунчилари.
Комиссия Ўзбекистонни қийноқлар, ҳуқуқбузарлик кенг тарқалган ва сўз эркинлиги бағоят чекланган жамият деб ҳисоблайди. “Ўзбекистон ҳукумати қийноқларни дарҳол бас қилиб, сиёсий маҳбусларни озод этиб, фуқаро жамияти ва мустақил матбуотга йўл бериши керак”, – дейилади Вашингтонда эълон қилинган баёнотда.
“Халқаро ҳамжамиятдан Андижон қирғинини ёдга олиб, ҳукуматдан ҳақиқий ислоҳотлар томон қадам ташлашни сўраймиз, токи Андижонда бўлгани каби фожиалар такрорланмасин”.
