Бошқа мавзулар
Қирғизистонда Қозоғистонда ишлаб чиқариладиган тўйинмаган унни ташиш ва ундан фойдаланиш таъқиқланди, дея хабар беради Хабар24.kz.
Президент Алмазбек Атамбаев ана шу жараёнга тааллуқли қонунга имзо чеккан. Қонунда қайд қилинишича, эслатмага риоя қилмайдиганлар 50 минг қирғиз сом жарима тўлашга мажбур бўлади.
Бу тахминан – 5 750 000 ўзбек сўми, яъни 250 минг қозоқ тенгеси демакдир. Бироқ қозоғистонлик экспертларнинг айтишича, Қирғизистон ҳукумати томонидан қўйилган бундай таъқиқлар Қозоғистон хўжалигига таъсир етказмайди.
Ўтган йили қўшни давлатга 27 минг тоннадан ортиқ ун етказиб берилган. Бу эса экспорт умумий ҳажмининг атиги бир фоизини ташкил этади.
“Қирғизлар томонидан бугунги кунгача Қозоғистонда тўйинмаган унга доир ҳеч қандай шикоят бўлмаган. Ун маҳсулотларимиз қўшни давлат бозорида илгаридан ўзига хос ўрин эгаллаган.
Демак, бу ерда сиёсий сабаблар бор”, дейди Қозоғистон ғалла етиштирувчилар иттифоқи президенти Евгений Ган.
Бизнингча, Ўзбекистоннинг янги президенти Марказий Осиё давлатлари ўртасида ҳамкорликларни, дўстона муносабатларни кучайтиришга интилаётган бир пайтда қозоқ-қирғиз қардошларимиз ўртасида бундай мажораларнинг келиб чиқиши расмий Тошкент учун ҳам оғриқли нуқта бўлса керак.
Муаллиф:Рўзибой Азимий
