Туркманистонда ҳайвонлар ҳуқуқларини ҳимоя қилувчи ва фуқаролар фаоли Галина Кучеренко 15 кунлик ҳибсдан сўнг 22 декабрь куни кечқурун озодликка чиқди. Бу ҳақда “Озодлик” радиосига фаолнинг яқинлари маълум қилди.
Ашхабодда истиқомат қилувчи, ҳайвонлар ҳимоячиси Галина Кучеренко қизи Валерия билан биргаликда 7 декабрь куни ўзининг шахсий хонадонидан куч билан олиб кетилган эди.
Кейинчалик маълум бўлишича, Галина ва Валерия алоҳида-алоҳида полиция ва судга олиб борилган. Ўша куни Валерия жаримага тортилди ва қўйиб юборилди, Галинанинг тақдири эса бир неча кун номаълум бўлиб қолди ва 12 декабрь куни қизига онаси билан учрашиш имконияти яратилди. Галина Туркманстон пойтахти яқинидаги Арзув қишлоғида жойлашган махсус ушлаб туриш муассасида экани аниқланди.
Галина Кучеренконинг яқинларининг айтишича, у қўшниларнинг аризаси бўйича ҳибсга олинган. Қўшнилар уйдаги антисанитария ҳолатидан шикоят қилишган. Маълум бўлишича, Кучеренко уйида ит ва мушуклани сақлаган. Фаолнинг қизининг сўзларига қараганда, 7 декабрь куни уйига қайтиб келганида, хонадонда ит ва мушуклар йўқлигини кўрган, хоналар тартибсиз бўлиб, қон излари бор эди.
Галина Кучеренко бир неча йилдан бери Ашхабоддаги уйсиз ҳайвонлар масалалари билан шуғулланиб келади, мунтазам равишда Туркманистон пойтахтидаги ит ва мушуклар шавқатсизларча йўқ қилинаётгани билан боғлиқ далилларни келтиради. Бир неча бор фаолга ҳукумат томонидан босим бўлгани, шунингдек ўз фаолияти учун таҳдидлар бўлгани маълум қилинган. Галина Кучеренкони ҳимоя қилиш мақсадида халқаро кампания авж олди.