Бошқа мавзуларСамарқанд вилоят, Пайариқ туманидаги Хўжа Исмоил маҳалласида яшайдиган аёл қўшнисининг 12 яшар қизини ваҳшийларча ўлдирганликда гумонланмоқда.
Ҳуқуқ-тартибот идораларининг дастлабки талқинига кўра, эрининг қўшни хотин билан ишқий саргузаштлари борлигини гумон қилган аёл, қасд олиш мақсадида унинг қизини ўлдириб, жасадни уйи яқинидаги далага кўмиб ташлаган бўлиши мумкин.
Пайариқ туманининг Хўжа Исмоил маҳалласида яшаган ва 10 декабрь куни бедарак йўқолган 5-синф қиз бола ўқувчининг жасади 25 декабрь куни далада, кўмиб ташланган ҳолда топилган.
Самарқанд вилоят, Пайариқ туман ички ишлар бўлими бошлиғининг ўринбосари, майор Амин Тошев тергов ҳаракатлари олиб борилаётганини айтди. Иш юзасидан бир аёл гумонланувчи cифатида ҳибсга олингани хабар қилинмоқда.
– Марҳум қизчанинг онаси бизнинг қишлоққа келин бўлиб тушганига ўн йилча бўлди. Отаси беш йил олдин вафот этган. Аввал қайнотасининг уйида бирга яшаб юрди. Кейин ўзларига бир уй қилиб, чиқариб қўйишди. Биз ҳам ҳали аниғини билмаймиз. Айтишларича, қўшни аёл шу ишни қилган. Қизчани болта билан уриб ўлдириб, уйи яқинидаги далага кўмиб ташлаган экан. Қизчанинг онасини эрига ўйнаш бўлган, деб гумон қилган экан. Шунинг учун унинг қасдини қизидан олибди, деган гаплар бор. Лекин бу ҳали расман тасдиқланмаган, – деди маҳалла фаоли.
Бу иш юзасидан Ўзбекистон Жиноят Кодексининг 97- моддси (Қасддан одам ўлдириш) бўйича жиноят иши очилган.
