Бошқа мавзулар
Ўзбекистон Республикаси Бош вазири Абдулла Арипов 10 январ куни Душанбега ташриф буюриб, Тожикистон Президенти ва Ҳукумат раҳбарлари билан ўтказган учрашуви пайтида Эмомали Раҳмон Тожикистон ҳеч қачон минтақа мамлакатларига муаммолар туғдирмаганлигини очиқ айтди.
Тожикистон Президенти матбуот хизматидан маълум қилишларича, Эмомали Раҳмон ва Ўзбекистон Бош вазири Абдулла Арипов ўтказган мулоқотда иқтисодий ҳамкорликларни ривожлантириш ва чегара масалалари муҳокама қилинган. Мулоқотда Бош вазир Қоҳир Расулзода ҳамда икки давлат Ташқи ишлар вазирлари Сирожиддин Аслов ва Абдулазиз Комилов ҳам иштирок этишган.
Президент Эмомали Раҳмон мулоқот чоғида Ўзбекистон билан муносабатлар Тожикистон учун катта аҳамиятга эга экани ва икки давлат раҳбарлари ушбу муносабатларни юқори даражага кўтаришга ҳаракат қилаётганликларини таъкидлаган.
Тожикистон президенти матбуот котиби Абдуфаттоҳ Шарифзоданинг айтишича, мулоқот чоғида икки давлат орасидаги савдо ва иқтисодий ҳамкорликларни ривожлантириш йўлидаги чекловларни бартараф этиш ва чегара масалалари муҳокима бўлди.
“Учрашувда чегара ва виза масалалари, фуқаролар борди-келдисини соддалаштириш, Хатлон вилоятини Ўзбекистон билан боғлаб турувчи темир йўл тизимини қайта тиклаш, чегара минтақаларини миналардан тозалаш ва чегарадаги мавжуд ўтиш нуқталарини очиш масалалари муҳокама бӯлди”–дейди А.Шарифзода.
Учрашувда икки давлат биргаликда замонавий хатарларга қарши курашиши, жумладан, терроризм ваэкстремизмга қарши курашиш масалалари ҳам муҳокама этилди.
Шунингдек, президент Эмомали Раҳмон минтақадаги сув ва энергетика манбаларидан фойдаланишда минтақа мамлакатлари учун ҳеч қачон мушкилликлар яратмаганлигини очиқ ва аниқ айтиб, Ўзбекистон билан ҳамкорликни янада ривожлантиришда қўшнилар манфаатларига зид амалларга йўл қўйилмаслигини таъкидлаган.
Муаллиф: Соҳиб Назаров
