Мусофирлик йўлларида умринг толди,
Ўт балоси жонгинангни қамраб олди,
Яқинларинг сочин юлиб, фарёд солди,
Орзулари армон бўлган юртдошим-а!
Қанча-қанча диллар чекди оҳу фиғон,
Бу кулфатга дош беролмас ҳеч бир инсон,
Айрилиқдан ўртаб бағринг ,йиғлайди қон,
Болалари сарсон бўлган юртдошим-а!
Бу мотамда еру осмон йиғлар тўлиб,
Умидларинг бисёр эди, кетди сўлиб,
Ногаҳоний офат ичра шаҳид бўлиб,
Тилаклари пайҳон бўлган юртдошим-а!
Оллоҳ энди у дунёда қадр берсин,
Сендан кейин қолганларга сабр берсин,
Охирати обод, пурнур қабр берсин,
Умри эрта хазон бўлган юртдошим-а!
Муаллиф: Нодира Одинаева
19.01.2018.